< Page:Œuvres complètes de François Villon.djvu
Cette page a été validée par deux contributeurs.
136
POÉSIES

Nullement, de paour de mesdire,
Jamais je ne l’ose desdire ;
À son gré parler je l’ecoute,
Puis emprès elle je m’accoute,
Sans luy vouloir riens contredire.
De mon faict je ne sçay que dire.

VI. RONDEL


Pour entretenir mes amours
Colorer me fault maints fins tours ;
Car ma bourse est très mal garnie
Pour fourrer le poignet tousjours.

Ung jour demande haults atours,
Et l’autre ung grant bort de velours,
Et je respons : « Or bien, m’amye, »
Pour entretenir mes amours.

Veez-vous ce donneur de bonjours ?
Il a faict en el tant de cours,
Practiqué l’art de baverie,
Qu’il scet moult bien, sans ce qu’il rie,
Dire sa pensée à rebours.
Pour entretenir mes amours
Colorer me fault maints fins tours.

VII. RONDEL


Tu te brusles à la chandelle !
Helas ! mon cueur, ne vois tu pas
Que danger est tousjours au pas,
Qui fait à tous guerre mortelle ?

    Cet article est issu de Wikisource. Le texte est sous licence Creative Commons - Attribution - Partage dans les Mêmes. Des conditions supplémentaires peuvent s'appliquer aux fichiers multimédias.